ІХ Республикалық «Айбын-2023» әскери-патриоттық
жастар жиыны қарсаңында
Жыл сайынғы дәстүр бойынша биыл Қазақстан Республикасы Қорғаныс министрлігінің «Спасск» оқу-жаттығу орталығында ІХ Республикалық «Айбын-2023» әскери-патриоттық жастар жиыны ұйымдастырылып өткізілетіні белгілі. Осы жиын алдында Қарағанды облысы білім басқармасының Приозерск қалалық білім бөлімінің «№1 жалпы білім беретін мектебі» коммуналдық мемлекеттік мекемесінің станионында 60601 әскери бөлімінің «Сағадат» әскери-патриоттық клубы, 06708 әскери бөлімінің «Жас зеңбірекші» әскери-патриоттық клубы және Қарағанды облысының Ақтоғай ауданына қарасты «Сарышаған кентіндегі жалпы орта білім беретін мектебі» коммуналдық мемлекеттік мекемесінің жоғарғы сынып оқушылары арасында сайыс болып өтті. Аталған сайыстың бет пердесін Приозерск гарнизонындағы Қарулы Күштер ардагерлері ұжымының төрағасы, Қазақстан Республикасының Құрметті азаматы Кенжебеков Тілек Алшымбекұлы ашып берді. Салтанатты бас қосқан ортада 60601 әскери бөлімі командирінің тәрбие және идеологиялық жұмыстары жөніндегі орынбасары подполковник Калымбетов Нурдос Маратұлы, Приозерск қаласының №1 жалпы білім беретін мектебі басшысының тәрбие жұмыстары жөніндегі орынбасары Медетов Нұржан Қасқырбайұлы, Сарышаған кенті жалпы орта білім беретін мектебінің алғашқы әскери және технологиялық дайындығы пәнінің оқытушы-ұйымдастырушы мұғалімі Ахмет Досжан Рахымжанұлы және Приозерск қаласы жастарының жанашыры Сулейменов Нурлан Марсұлы құттықтау сөз сөйлеп, сайысқа қатысушы мектеп оқушыларына сәттілік тіледі.
Сайыстың мақсаты – Республикалық «Айбын» әскери-патриоттық жастар жиынының маңыздылығын кеңінен насихаттау, мектеп оқушыларына әскери-патриоттық тәрбие беру, әскер жасына дейінгі жастардың бойына патриоттық сезімді қалыптастыру және өскелең ұрпақтың отаншыл сезімін ояту болып табылады. Жасыл алаңда мектеп оқушылары әскери сайыс түрлерінен АК-74 автоматты атыс қаруын бөлшектеу және жинау, радиациялық, химиялық және биологиялық қорғаныс түрінен жаттығу, пневматикалық қарудан нысананы көздеу, кермеге тартылу, денені арқаға жатып көтеру және топтық құрамда арқан тартудан сынға түсті. Нәтижесінде, жүлделі бірінші орынды ұтып алған 06708 әскери бөлімінің «Жас зеңбірекші» әскери-патриоттық клубы жарыс жеңімпаздарының ауыспалы Кубогына ие болды. Клуб тәрбиеленушілерінің қатарынан И.Жумабек, Ж.Әшірбек, М.Нарзиев, Т.Таткен, Д.Шадыбай және Д.Мусатаева жеңіске жету жолында асқан ептілік таныта білді. Жүлделі екінші орынды 60601 әскери бөлімінің «Сағадат» әскери-патриоттық клубының тәрбиеленушілері иеленді. Жеңіске жетуде клуб тәрбиеленушілері А.Шайхстан, А.Сайлаубек, С.Садуллаев, А.Сембек, Н.Ислам және Б.Жумағали ерекше көзге түсті. Ал, жүлделі үшінші орынды Сарышаған кентінен келген жалпы орта білім беретін мектебінің жоғарғы сынып оқушылары қанағат тұтты.
Әскери сайыс түрлерінен өткен сайыс қорытындысында жеңімпаздарға арнайы Дипломдар салтанатты түрде табыс етілді. Сайысқа қатысушылар арасынан өзінің шапшаң қимылымен ерекше көзге түскен Сарышаған кентінің жалпы орта білім беретін мектебінің 10 «б» сынып оқушысы Дәулет Мадияр Хамитұлына сайысты ұйымдастырушылар тарапынан арнайы тағайындалған «Ең үздік жас сарбаз» номинациясына ие болды.
Жарысты ұйымдастыру мен өткізу барысында Приозерск қаласының №1 жалпы білім беретін мектебінің алғашқы әскери және технологиялық дайындығы пәнінің оқытушы-ұйымдастырушы мұғалімі Умирзахов Естай Еламанұлы және Приозерск қаласының №2 жалпы білім беретін мектебінің алғашқы әскери және технологиялық дайындығы пәнінің оқытушы-ұйымдастырушы мұғалімі Файзуллаев Мұрат Қайратұлы белсенділік көрсетті.
Жоғары деңгейдегі ұйымшылдықпен өткен жарыс соңынан барлық қатысушылар естелік фотосуретке түсті.
Приозерск гарнизонының баспасөз хатшысы
лейтенант Думан Жұмашұлы
Comments